الثلاثاء، 6 يوليو 2010

ليالي مصرية 24

الحلقة 24
بقلم حنعيش يعني حنعيش


كرد فعل طبيعى جرى طارق وشال ميار من الارض وسط ذهول المعازيم من تصرفه .... حاول طارق ان يظهر تصرفه على انه تصرف طبيعى بحكم انها موظفة في شركته... فقال : شوفوا لنا دكتور بسرعه ... وماتخلوش حد من المعازيم ياخد باله ... مش عايزين الفرح يبوظ ...حملها الى غرفة ملحقة بالقاعة متبوعا بالدكتور محمد والدكتورة عبير التي مسكت ايد ميار تشوف لها النبض ... محمد جاب الشنطة اللى مابتفارقهوش حتى فى فرح اخته .... قاس الضغط وعطى لميار حقنة فى الوريد ... ميار فاقت وسط سعادة الموجودين .... وقالت : انا اسفه ياجماعه خضتكوا .... اصل بقالى يومين مانمتش ... كل اللى حواليها قالولها سلامتك ....طلبت عبير منهم يسبوها شوية مع ميار واول لما بقوا لوحدهم قالت لها عزيزتي هل انت متأكدة ان ما حصل لك سببه قلة النوم عموما انا افضل ان تزوريني في المستشفى لنتأكد من الامر وثقي ان كل ما سيحصل سيبقى سر بيننا نحن الاتنتان اطرقت ميار بنظرها للارض للحظات ثم رفعت عينيها لعبير بنظرة كلها امتنان وقالت ان شاء الله دكتورة سأفعل.

عاد كل شئ الى طبيعته رجع الجميع الى القاعة واستمر الحفل الا محمد ... طلع برة القاعة وقعد مع نفسه وطلع علبة السجاير وولع سيجارة ....وأخذ يفكر ترى مابها ميار لم طلبت عبير ان تبقى معها لوحدها ما سر لهفة طارق المبالغ فيها عليها افكار كثيرة كانت تراوده حتى الاكثر سوداوية منها يانهار اسود ميارممكن تكون حامل ... طاب ازاى .... ميار ... يانهار اسود ... طاب اعمل اية ... وايه اللى خلاها تعمل كدة ... دا ابويا لو عرف يموت فيها ... ازاى ... انا حاقتلها ايوة حقتلها ... واقتلها لية ... مايمكن تكون متجوزة من ورانا ... يارب تكون متجوزة حتى لو عرفى .. ماشى ماشى ما كله بيتجوز عرفى دلوقت ... مانص الكلية كانوا متجوزين الاساتذة عرفى ... مصلحة بتتقضى ومابنغضبش ربنا عادى دلوقتى ... انا اللى اهبل مش فاهم الدنيا ... واخد الطب رساله ... والنتيجة .... سبع سنين مذاكرة وتلاتة دبلومة وعشرين كمان علشان اجيب شقة ايجار مؤقت ... وفى الاخر مستكترين عليه اشتغل مع ايهاب فى المستشفى .... انا اللى عبيط ... بيصعب علية العيانين الغلابة ... واكتب لهم ادوية رخيصة ... ماهو لو كنت باكتب الادوية بتاعة الشركات المالتى ناشيونال ... كانت مناديب الشركات دى روقتنى ... اشى مؤتمرات واشى مرتبات ... عيشة ... انا عند ايهاب حاخد مرتب كويس ... والشركات حتجيبلى اجهزتى ... عبير دى عبيطة ... دى المفروض تساعدنى انى اقب على وش الدنيا ... يارب انا مش طالب لا فيلا ولا شاليه فى كمبوند .... كل اللى طالبة شقة اودتين وصاله ... ولا حتى الاودتين وصاله مش حأعرف اجيبهم الا لما انحرف ... الله.... ايه اللى انا بقوله دة هوه ده وقته .... انا فى المصيبة اللى اسمها ميار .... اعمل اية؟!!... يارب

***********************
هدى أخدت احمد وطلعت الجنينة ... وقالت له مستفسرة : انت مصمم برضه على السفر ... رد احمد بتحد : ايوة طبعا ... هنا ظلمة ... مافيش امل ... اخويا الدكتور المتعلم عالى مش لاقى ياكل ... انا بقى ابو دبلوم حأعمل اية ان شاء الله؟
انا عايز ابقى غنى عندى فلوس وعربية وورشة زى بتاعة الحاج.... هدى : وانت يعنى ماتعرفش تعمل دة هنا ...احمد بص لهدى نظرة استغراب وقال لها : لا طبعا .. انتى بيجيلك كل اللى بتطلبيه .. لأ بيجيلك كل اللى بتحلمى بية ...انتـــ ..... هدى قاطعت احمد وقالت : احمد انا بحبك انت مش حاسس بده
احمد ضحك ضحة هستيرية وقال لها : مينفعش ياهدى ... هدى : طب مينفعش ليه هو عيب ولا حرام ... احمد : هو لاعيب ولا حرام لكن مينفعش عشان هو ماينفعش .. شوفى انت فين وانا فين ... طاب والنبى حأفهمك ازاى وانتى بتتكلمى انجليزى ...ربنا يهديكى ... وقام شدها من ايديها .... يالا يالا نشوف العروسة والعريس الا قربوا يخلصوا ...

*********************

يادوب احمد داخل من باب القاعة وابو خارج ينفخ ... فهمى خبط فى احمد وهو داخل ... احمد قاله فيه حاجة يابابا ... مالك ... فهمى : مافيش خش شوف المعازيم .... ويدوب احمد بيتدور علشان يخش لقى زينب طالعة جرى ورا فهمى ... سالها : فيه حاجة ياماما ... قالت له : والله مانا عارفة يابنى .... ابوك وطبعه بقى ..... طلعت زينب ورا فهمى لقته قاعد تحت شجرة ... قعدت جنبه وقالت له : مالك بس ياحاج ... قالها بغضب : مالى مش شايفة بنتك وعمايلها ... مش شايفة بترقص ازاى ... هي العروسة ولا الرقاصة ....زينب وهيه بتضحك : عروسة وفرحانة ياحاج ... مش ليلة دخلتها ... عايزها تقعد تحط ايديها على خدها ... فهمى : دى بترقص ولا فيفي عبده الرقاصة ... اتعلمت الحاجات دى فين ؟
زينب : جرى ايه ياحاج .. انت نسيت رقصى ولا اية ؟ ... فاكر لما كنت بتقول عليا فشر سهير زكى ... اهو اكفى القدرة بقى ...
فهمى وقد بدأ يهدأ قليلا : ماقولناش... بس كنتى بترقصى لى لوحدى ... لجوزك ....ماكنش عينى عينك كدة قدام الناس ؟
زينب : ياراجل الزمن اتغير ... والافراح كلها بقت على كدة ....
فهمى : يعنى هوه دة صح ... حنغضبوا ربنا بقى على اخر ايامنا ؟
زينب : ياسيدى انت مالك ... هية دلوقتى فى عصمة راجل ... هوة حر بقى .. .. يالى بقى ندخل الفرح ... ولا عايز المعازيم يلقحوا علينا بالكلام ويقولوا سايبين بنتهم وقاعدين برة ... يالا ... ولما نروح حأوريك الدهن اللى فى العتاقى ... مش تقولى نجوى فؤاد ياراجل يابو عين زايغة ... الافيفي عبده قال دى كمان .... دى عندها مغص ...

******************

يادوب فهمى وزينب دخلوا القاعة والزفة بدأت .... ركبت دعاء وعريسها العربية .... زينب وقفت ترش الملح على العرسان ...ميار عينيها ماسابتش عين طارق كان نفسها تمسك ايديه وتروح معاه.... عبير سلمت على محمد وقالت له عقبالك .... ابتسم ومردش ... سلمى خرجت هي وياسر بس الغريبة ماكانوش ماسكين ايد بعض زى ماكانوا وهما داخلين الفرح ... هدى سلمت على احمد وقالت له لسه كلامنا ماخلصش ... احمد قالها: خلى بالك من نفسك .... فهمى فك الكرافته بحركة سينمائية وهوه بيركب العربية جنب زينب ... قال يعنى الكرافتة دى هيه اللى مانعاه من الانطلاق .

الحلقة القادمة بقلم منار

هناك 41 تعليقًا:

خواطر شابة يقول...

حنعيش يعني حنعيش
حلقة هادئة لم تأتي بمفاجأت فقط طورت من أحداث موجودة برتم هادئ وتركت الباب مفتوح امام من سيكتب بعدك ليقرر ويشكل الاحداث التي يريدها
دمت بكل ود ومتنساش طلبي باقتراحات لما بعد انتهاء فترة ولايتي

(ست* جنى* الحسن) يقول...

سلامو عليكو..
طريقة سرد الاحداث والتعمق فى التفاصيل حلو اوى
عجبنى اوى حوار فهمى وزينب
لك تحياتى

خواطر شابة يقول...

(ست* جنى* الحسن)
وعليكم السلام ورحمة الله
سعيدة ان الحلقة اعجبتك كل التحية هي للدكتور اسلام هو صاحب الحلقة
دمت بكل ود عزيزتي

حاجات جوايا يقول...

فهمى فك الكرافته بحركة سينمائية وهوه بيركب العربية جنب زينب ... قال يعنى الكرافتة دى هيه اللى مانعاه من الانطلاق .

ههههههههههههههههههه
د اسلام مركز اوى مع فهمى وزينب
هههههههههههههه



سلمى خرجت هي وياسر بس الغريبة ماكانوش ماسكين ايد بعض زى ماكانوا وهما داخلين الفرح

حلو اللغز اللى فى وسط الاحداث ده
هيفتح مجال للغوص فيه

ربنا يستر على محمد بقى
انا خايفة ينحرف
واملى يضيع فيه هو كمان

تسلم الايادى يا دكتور
الحلقة جميلة بجد

دمت بكل الخير والسعادة

حاجات جوايا يقول...

خواطر شابة
------------
يا ريت يا عزيزتى تعملى صفحة التعليقات عادية زى بتاعتنا

الواحد عينه بتطلع عشان يسجل تعليق :)

تحياتى وودى

همسات وبحــ الحياه ــر يقول...

بصى هو انا كل مرة هاجى اسلم كدا وامشى
اصل انا قريت وتهت
:):)

Unknown يقول...

حنعيش يعني لازم نعيش

أسلوبك راقى وجميل وساخر وناقد...

مانص الكلية كانوا متجوزين الاساتذة عرفى ... مصلحة بتتقضى ومابنغضبش ربنا عادى دلوقتى

دكتور متهيئلي مش نص الكلية دا نص البلد متجوزة عرفي وربنا يستر علي الاجيال القادمة من هذة الظاهرة المدمرة للمجتمع .
وفقك الله لكل خير

shimaa elkholy يقول...

استااااااااااااااااذ

بس كده يا دوك تخلي ميار حامل نعمل ايه دلوقتي بقى

تسلم اديك يا دوك بجد حلقه جميله

باحب فى طريقتك فى كتابة الحلقات الانسيابيه تحس الدنيا ماشيه ببساطه

تحياتي يا فندم

منوره يا ريسه

خواطر شابة يقول...

حاجات جوايا
صفحة التعليقات مثل التي عندكم لم أفهم فهميني كيف ذلك
بالنسبة للحلقة فعلا الدكتور اسلام ترك الباب مفتوح لمن سيكتب بعده لم يقيده بشئ ابدا
دمت بود عزيزتي

خواطر شابة يقول...

دموع القمر
بداية انت تنوري حتى لو حتسلمي فقط
تانيا القصة متسلسلة لتتابعيها وتفهميها اضغطي على الصورة التي على السايدبار مكتوب اعلاها ليالي مصرية ستجدين الحلقات كاملة
دمت بكل ود عزيزتي

خواطر شابة يقول...

ali younes
هنا حكاية الزواج العرفي غير معروفة ولا متداولة لكن احيانا أجد انه هو ارحم من علاقات لاضابط لها ولارابط
تحياتي

خواطر شابة يقول...

ندى الياسمين
بداية اضم صوتي لصوتك في فكرة انسيابية الحلقة وهدوءها
تانيا ياسيادة الرئيسة السابقة فكري معي في نهج لمما بعد ولايتي انا سأستضيف الليالي الى الحلقة 30 لكن وماذا بعد أنا لااريد للفكرة ان تتوقف لهذا يجب من الان التفكير في الامر انا منتظرة اقتراحات منك ومن الجميع ايضا
تحياتي وودي

حنعيش يعنى حنعيش يقول...

خواطر شابة
شكرا ياست الريسة ... ياجماعة الريسه صلحت لى شوية حاجات ... علشان القصة ترجع للتمانينات
جنى
سعيد بتعليقك

حاجات جوايا
والله انا مركز مع كلة ... بس زينب وفهمى ... بيدوا نوع من الكوميديا الخفيفة اللى تحسسك ان الدنيا مش مستاهله الحرب اللى دايرة دى ...

Tears يقول...

اسلوب جميل و ممتع :)

حنعيش يعنى حنعيش يقول...

على يونس
اخجلتم تواضعنا ياباشمهندس ... وربنا يبعد عننا العرفى

ندى الياسمين

استااااااذ ... كده مضطر اقولك ... ياوديييييع
يلا بقى فجرى المفجأة يتاعة الليالى

عايش... ولكن !!!! يقول...

اسلوب رااااااائع وسهل وبتلمس الواقع المؤلم من انتشار الزواج العرفى حقيقى مبدعه

خواطر شابة يقول...

Tears
نورتينا عزيزتي
دمت بكل ود ومحبة

sony2000 يقول...

بجد اسلوب رائع جدا
بس احب اقول حاجه...ممكن فذمن القصه يكون في الجواذ العرفي وكدا ذي مابيقولو نص الطلبه والاساتذه
لكن انا اهو فالجامعه وخلصت اخر امتحانات فالتعليم اهو ولا لقيت ولا حاله من حالات الجواذ العرفي نهائي وانا قريبه من الكل والحجات دي موش بتستخبي
ارجو المعذره بس حاولت اني اوضح نقطه
والسلام عليكم:)

خواطر شابة يقول...

ندى الياسمين
ايه حكاية مفاجأة الليالي شوقتونا هو انا رئيس ورق يعني ده ايه الرئيس اللي اخر من يعلم ده هههه
دمت بود

Unknown يقول...

الاخت خواطر
كلماتك
هنا حكاية الزواج العرفي غير معروفة ولا متداولة لكن احيانا أجد انه هو ارحم من علاقات لاضابط لها ولارابط


والله احب ان اقول لحضرتك ان العرفى هو اكبر علاقة ليس لها ضابط ولا رابط وهي والله اعلم الحرام بعينة الا أذا كان الاهل يعلمون به ولا يظهرونة لظروف ما ,أما أذا كان بين الاثين فقط فهذة هي الطامة الكبرى ...

عزيزى الدكتور إسلام .
والله يا دكتور انت لها ولم اقل عنك إلا الحق وما رئيتة من إسلوبك المميز زادك الله من فضله

تقبلوا تحياتي

م/ علي يونس

خواطر شابة يقول...

عايش ولكن
بداية شكرا على المرور الكريم وان شاء الله يدوم التواصل
تحياتي وودي

خواطر شابة يقول...

sony2000
عزيزتي بداية هذه قصة وليست حكاية واقعية
تانيا مشكلة الزواج العرفي موجودة ولايمكن انكارها والا لما تطرقت لها الافلام وناقشتها البرامج لكن اكيد هي ليست بالحدة التي تحدث عنها الدكتور اسلام ولايمكن ايضا تعميمها على الجميع
دمت بكل ود ومحبة عزيزتي

خواطر شابة يقول...

ali younes
انا في قولي السابق لم اكن اقصد جعله حلال انا اعرف ان الاصل في الزواج الاشهار والولي لكن انا فقط فاضلت بين امرين أحلاهما مر ربي يهدي الجميع لما فيه الصواب ان شاء الله
دمت بكل ود

حنعيش يعنى حنعيش يقول...

خواطر شابة
شوفتى ياريسة ... كان لازمن تعملى جهاز امن دوله وجهاز مخابرات ... علشان تعرفى ايه اللى بيحصل من وراكى .... شوفتى موضوع الحكم صعب ازاى ... قدروا بقى ..
دا لاسر ولا حاجة ... دى حاجة احنا التلاتة متفقين عليها .. من زمان بس مشاغل الحكم هية اللى نسيتك ... احنا اتفقنا ان احنا حنعمل مدونة مستقله لليالى ... واتفقنا ان ندى اللى حتصممها ..

richardCatheart يقول...

هااااااااااااايل يا جماعه

برافو لكل اللى كتب الحلقات الاخيره دى جميله

اسفه والله الدنيا كانت مدربكه عليا ماكنتش عارفه اتابع

بس بجد تسلم الايادى
تحياتى للكل

خواطر شابة يقول...

حنعيش يعني حنعيش
فعلا الامر أصبح ملح كي تستمر الفكرة ان شاء الله يتم الامر قريبا
دمت بكل ود

خواطر شابة يقول...

ريتشارد قلب القطة
عزيزتي انتهت الامتحانات ولم يعد لك عذر فتابعينا وشاركي في اقتراح فكرة للقصة القادمة
دمت بود عزيزتي

حاجات جوايا يقول...

خواطر شابة
-------------
لا يا جميل صفحة التعليقات مش زى بتاعتنا
صفحة التعليقات عندى صفحة مستقلة بذاتها
لكن هنا التعليق بيكون تحت البوست
المشكلة مش فى كده خالص
المشكلة انى مثلا لما بحب اسيب تعليق
لازم اكتبه الاول
وبعدين احدد انى حساب جوجل
واضغط كتابة تعليق
وبعدين يرجعلى تانى ومكتوب تحته انى ضمن حساب جوجل
واضغط كتابة تعليق
يدخلنى اكتب اليوز نيم والباسوررد
وبعدين يدخلنى معاينة
واخيراااااااااااا اضغط كتابة تعليق يتنشر
هههههههه
الحياة عندنا اسهل كتير
تكتبى التعليق وتسجلى الدخول وخلااااااااص


الطريقة هجيبهالك اهه

حاجات جوايا يقول...

الطريقة يا خواطر
--------------
بتدخلى من لوحة التحكم dashboard
على design
وتختارى تانى تبويب من فوق اللى هو settings او اعدادات

ومنها تختارى comments
اللى هو رابع تبويب

بعد كده تروحى لتالت عنصر اللى هو
Comment Form Placement

وتختارى اول اختيار full page

وتحفظى التغيرات

بس خلاص

خواطر شابة يقول...

حاجات جوايا
يعني عندك حاجة توماتيكي توماتيكي على رأي عادل امام

خواطر شابة يقول...

حاجات جوايا
يالله يا ستي اهي الحياة بقى لونها بمبي هو أنا يهمني ايه غير راحة الشعب ههه

غير معرف يقول...

الحلقه جميله وهاديه وخاليه من اي صدام او تعاوير :)

تسلم ايدك يا دوك

تحياتي

shimaa elkholy يقول...

بريئه يا ريسه والله

انا بس لسه ما خلصتش الشغل الى ورايا

انا كان المفروض اسلم المدونه دي من قبل ما اسيب الرئاسه بس انا سافرت بقى انتم عارفين وسلمتك الرئاسه بدري

د اسلام لا صعب ولا مستحيل ولا المخابرات ما قلناش لا بس مش مطلوب منها تكون جهاز بيستخدم طرق غير شرعيه للحصول على المعلومات

الرسول عليه الصلاة والسلام كان عنده جهاز مخابرات
على اده بس كان موجود

والمخابرات مش عشان تحمي الاسره الحاكمه لا عشان مصالح الشعب والدوله مش حكام الدوله


خد بالك انت دايما تنكشني

حاجات جوايا يقول...

100 100 يا ريسة
ونعم الرؤساء بجد
ما أجمل ان يستجب الرؤساء لمطالب الشعب
:)

خواطر شابة يقول...

فتاة من الصعيد
عزيزتي الحلقة فعلا هادئة لكنني احسه الهدوء الذي يسبق العاصفة فلننتظر ولنرى ماذا سيحدث
دمت بود

خواطر شابة يقول...

ندى الياسمين
ههه هو انت عندك حساسية من كلمة مخابرات
من فضلك حبيبتي يجب اتخاذ قرار نهائي وانشاء المدونة القصة القادمة يجب ان تبدأ هناك
دمت بكل ود عزيزتي

خواطر شابة يقول...

حاجات جوايا
هو انا ليا بركة الا الشعب

غير معرف يقول...

حلقة جميلة وهادية
بس دبستنى يا د/اسلام فى حكاية ميار دى
يللا مش مشكلة
___________________

خواطر شابة
وصلتك الحلقة؟

خواطر شابة يقول...

منار
نعم عزيزتي وصلتني رجاء الاطلاع على ايميلك

رحاب صالح يقول...

مساء الورد
ازيك شو اخبارك
الحلقة جميلة وممتعة بجد واسلوبك سلس وسهل ولذيذ , للأسف مش تابعت الحلقات ولا هقدر اتابعها الا بعد امتحاناتي ما تخلص
دعواتك

خواطر شابة يقول...

رحاب صالح
دعواتنا من القلب لك بالتوفيق والنجاح ان شاء الله
متنسيش نصيبي في الحلاوة مع دكتور اسلام ههه
دمت بكل ود عزيزتي