الأحد، 11 يوليو 2010

ليالي مصرية 26

الحلقة 26
بقلم ندى الياسمين


اكثر ما يشعر المرأه بجرح عميق هو خيانة زوجها حتى لو كانت لا تحبه فما بالك لو كانت احبته ميار لم تكن بالبشاعه الي وصفها طارق … وطارق هو كمان ما كانش كده اصابته بفيرس كبدي جعلته كالمجنون …. اوقات بيبقى زي طفل صغير فى حضنها وبيتخبى فيه من المرض واوقات تانيه يبقى زي ا مبارح كده يجرحها بكل سكينه تطولها ايده

ميار عادت من زيارة والدها وما راحتش الشركه النهارده راحت على بيتها وقفلت عليها اوضتها واستسلمت لدموعها الى لا يمكن تظهر قدام حد

محمد اتجوز عبير من سنه وعبير حامل … صحيح محمد ما اشتغلش فى مستشفى الدكتور ايهاب … محمد فتح عياده بمساعدة ميار له … وما شاء الله خلال سنتين من العياده كان دافع مقدم الشقه والعربيه صحيح مش عياده فخمه ومش عربية فخمه بس كبدايه وفى سنتين حلو اوي واتجوز عبير ولسه لحد دلوقتي بيسدد في باقي تمن الشقه

بس محمد بيحب اهله اوي شايف مصالحهم كلهم وابوه الله يرحمه كان عارف انه اد المسؤليه وقبل ما يموت كان محمد ملازمه فى مرضه الى استمر شهر واحد كان دايما يوصيه على اخواته وامه ومحمد عمل بالوصيه

محمد عمل عياده وما اشتغلش مع ايهاب وما باعش ضميره … لكن بصراحه بطل هبل شويه .. وبطل يفكر بمثاليه زياده …
محمد وهو فى عيادته النهارده دخل عليه مندوب متانق لاحدى شركات الادويه .. وسلم عليه اداله ظرفين وقاله اتفضل يا دكتور دي دعوة المؤتمر بتاع لندن ودي التذكره والمصاريف محمد ابتسم وقبل الظرفين وتبادل احاديث حول العمل والادويه مع المندوب وانصرف لحاله
ايه فيى ايه ؟؟ هو يعنى عمل ايه غلط ؟؟
مافيهاش حاجه يعنى لما يمشي نوع دوا معين اكتر من التاني ما دام مش هايضر المريض …. مافيهاش حاجه برضه لما يدي لمريض شكله مش غلبان اوي علبة فيتامينات كده ولا حاجه اهو برضه من مصلحته..
اهو برضه شركات الادويه بيسندوه برضه من هنا ولا من هنا وهو اليومين دول مزنوق حبتين ..

احمد عشان يتقدم لهدى لازم يبقى ادها … اول حاجه عملها لما نزل مصر قدم فى جامعه خاصه … ايوه صديقه المصري هناك فى فى استراليا قاله عنها .. وعشان ما يبقاش حاسس انه عنده حته ناقصه عن هدى الجامعيه … رغم ان ده ما كانش هايفيده باي حاجه لغة المال والاعمال ما بتتحسبش باسامي وشهادات مالهاش لازمه

والنهارده راح يشوف ارض كبيره فى المدن الجديده .. هايعمل عليها مصنع اثاث كبير اصله ناوي يشتغل على كبير ناوي يصدر اثاث … بس لسه بيدرس وبيدور … احمد اتغير اتعلم يحسب كل حاجه كويس بالمسطره قبل ما يبدأ فيها ….

قعدت لساعات طويله والدموع لا تنقطع ويبدو انها حتى ما كانتش حاسه بالدموع بتجري من عنيها ومش حاسه بالوقت من حواليها وتكلم نفسها .. انا ازاي وصلت لكده ؟؟؟ أنا ميار الى ما حدش يقدر يقف قدامي ولا يعطل احلامي توصل بيا الدنيا للانكسار ا لى انا فيه ده ؟؟
وتتذكر طارق .. وتقول فى نفسها الحب … كل كبوه بتحصلي بتكون بسبب الحب اقطع قلبي عشان يبطل يدق
فى الحقيقه هى صحيح بدأت علاقتها بطارق بمصلحه وحتى طارق نفسه بدأ علاقته بها بزواج سري لكن بعد فتره طارق فعلا حب ميار وميار ضعفت قدام حبه وحبته فعلا . وخصوصا ان بدأت مصالحهم تبقى مشتركه .
ولما الفكره دي تيجى على بالها تقول بغيظ غبييييييييييه …

وافتكرت ميار اول مره قلبها دق بحب حقيقى لطارق يوم لما شال اياد اول مره وحست فى عنيه الفرحه باياد وبيها قررت ان ده الى يستحق انها تحبه وتعيش معاه عمرها وكفايه جري هى حققت فعلا كتير وهى مع طارق هاتحقق اكتر

وتفتكر حب طارق … حقيقى طارق حبها مش معقول تكون هى كانت بيتهيئلها لا مش للدرجه دي

وتفتكر السعاده الحقيقيه الى عاشوا فيها مع بعض الكام سنه الى فاتت
وتقول بصوت مسموع …. ليييه .. ليه بيعمل كده … انا حبيته !! ..
من يوم ما عرف انه عنده فايرس سي وهو بيعاملنى كده ليه وبيعمل معايا كده ليه …
انا ذنبي ايه فى مرضه ؟؟… ده
وتفتكر طارق امبارح وهو يعدد افضاله عليها وعلى اسرتها .. وتصرخ كمجنونه … لا ما حصلش ..
وتقول لنفسها … انا الى ساعدتهم بمجهودي وتعبي عيادة محمد انا ساعده فيها اه بس مساعده بس وما اقدرش ما اقفش جمب اخويا بعد الى حصلي لما اكتشفت اني حامل وما لقيتش غيره ارمي عليه همومي والله اعلم جايز لولا وقفته جمبي كان طارق عمل معايا ايه واحمد انا ما بعتلوش حاجه تذكروشقة ماما اه هو ساعدهم فيها بس عشان مصلحته لما عرف ان بابا هايدفع مكفأه المعاش مقدم شقه لاحمد وقال احمد ما اتعلمش زيكم وانا قلقان عليه اقترح هو انه يساعده ياخدوا شقه فى عمارة صديق له وقال لميار خليهم يقعدوا فيها على ما احمد يتجوز بدل المكان الغير لائق الى هما قاعدين فيه ( كان خايف على شكله قدام قرايبه واصحابه )وافتكرت ميار ان رغم انها وافقته ايامها الا انها لا تنسى انها كانت لحظه جارحه

واي مساعده قدمتها لاهلي من تعبي وفلوسي
ايوووه فلوسي
انا وقفت الشركه على رجليها
كتبها باسمي ؟؟
ايوه انا سعيت اني ا خليه يكتبها باسمي فعلا .. كنت عايزه احس بامان اكتر
بس هو كتبها باسمي وهى غرقانه عشان اشيل المسؤليه
وانا رضيت اشيل ولما بقت الشركه حاجه كبيره
قال انى استغليته
مين استغل مييين…

كل دي افكار بتجري فى عقلها هاتجنن

وتفوق على صوت باب اوضتها والشغاله بتقولها اخت حضرتك على التليفون يا هانم تقولها مش عايزه اكلم حد دلوقتي …. وبعد ثانيه ترجع تقولها استنى هاتي التليفون وتكلم دعاء وتحاول تخفي الدموع فى صوتها بس دعاء حست بيها وقالت لها انا جيالك حالا ……

دعاء دلوقتي عندها بنت وولد وبقت صحفيه صحيح مش مشهوره اوي بس بتكتب فى جريده محترمه وبتكتب كلام محترم جدا … حازم جوزها من سنتين كده عدى بازمه ماليه فظيعه اضطر معاها هو ووالده انهم يقلصوا اعاملهم جدا والحاله الماديه من يومها مش اوي صحيح .. انما مستورين وبدأ حازم يوقف الشغل على رجليه تاني بنشاط جديد هو بدأه باستيراد أجهزة كمبيوتر من الخارج بشراكه مع احد اصدقاؤه

دعاء راحت لميار … وميار اترمت فى حضنها واول مره دعاء تشوف ميار كده ….وبعد ما حكيت ميار لدعاء الى حصل …. دعاء كانت بتهدي فيها وتصبرها وتحاول تهون عليها انها تستحمله لانه مش فى حالته الطبيعيه ..

والحقيقه ميار كانت اوقات بتقتنع بكلامها … وبعد ثواني ترجع تقولها .. مش ميار الى يعمل فيها كده .. هو ما عادش يهمنى فى حاجه انا اقدر اعيش من غيره بكل بساطه .. هو الى محتاجلي دعاء تقولها : عشان انتى ميار ما ينفعش تتخلي عنه فى محنته وده جوزك وابو ابنك
الحقيقه كان كلام دعاء بياثر فيها … بس هى كان جواها جرح كبير .. ومش عارفه تعالجه ازاي

وهما بيتكلموا دخل عليهم طارق ……..

الحلقة القادمة
بقلم خواطر شابة

هناك 32 تعليقًا:

خواطر شابة يقول...

دى الياسمين
عزيزتي بدأت كثير من التفاصيل تتضح وهذا كان مطلوب
سنرى الحلقات اللاحقة الى اين ستقودنا وما نهاية ميار
دمت بود عزيزتي

خواطر شابة يقول...

حاجات جوايا
انت تؤمر ياجميل ضحكتيني والله بحكاية الجرعة دي
سبب تأخير النشر مشكلة في حاسوبي لكني حرصت على النشر قبل أن انام
دمت بود عزيزتي

خواطر شابة يقول...

ندى الياسمين
اسفة اكلت النون خطأ مطبعي عزيزتي

shimaa elkholy يقول...

ولا يهمك يا خواطر ده نون يعنى وحياتك ما خدت بالي
هههههههههههه

يلا شوفوا من ورايا بقى هايعمل فيكوا ايه
ههههههههههههههه

خواطر شابة يقول...

ندى الياسمين
اين وصلت مدونة الليالي عزيزتي

حاجات جوايا يقول...

خواطر
---------
ههههههههههه
دى بقت ادمان يا بنتى بجد
عايزة انام وكل شوية ابص عالريدر مش لاقية
اخيرااااااا لقيتها
وجدتهااااااااا
أحمدك يارب
ههههههههههههههههه

حاجات جوايا يقول...

ندى الياسمين
----------
بتعجبنى دماغك اوى يا ندى فى شرح التفاصيل
خبرة بجد
ما شاء الله

تطور شخصية احمد جميييييييل
شاب مصرى مكافح طموح بيقدر الجميل وعنده كرامة وعزة نفس
100 100

صعبانة عليا ميار
ربنا معاها


برافو يا ندى
الحلقة جميلة وهادية وفيها تفسيرات كتير للاحداث

.........
ربنا معاكى يا خواطر
الدور عليكى يا ريسة :)
متتاخريش بالجرعة هههههههه

حاجات جوايا يقول...

بقترح اسم " ضربات القدر "
مؤقتا لغاية الحلقة الاخيرة ما يبان هيحصل فيها ايه

خواطر شابة يقول...

حاجات جوايا
حلو اسم ضربات القدر ولو اننا احيانا نحن من يصنع اقدارنا

shimaa elkholy يقول...

المدونه يا خواطر عايزه بس ترسوا على اسم
عشان انزل البوستات مره واحده بالاسم الجديد
بدل ما ارجع الف عليهم تاني


ولسه ما عملتش بانر والله كمان

اختاروا بس انتم اسم يلا

وعلى فكره انا باقترح ان بعد كده اختيار الاسم يكون مقدم مع الفكره

يعنى الى هايقدم فكره هو الى يقدم اسم القصه

ايه رايكم ؟

shimaa elkholy يقول...

حاجات جوايا

مرسي يا جميل على الكلام الجميل ربنا يخليكى

وايه حكايةالادمان معاكي بقى

حالتك بقت خطر ههههههههههههههههههه

حاجات جوايا يقول...

ملحوظة بس صغيورة
>>>>>>>
فى حلقة فتاة من الصعيد 23

هروح أكون نفسي وأشوف مستقبلي هناك ... واحد صاحبي جابلي عقد عمل في السعوديه في مصنع هناك .... والاسطى والدك عارف

يعنى هو كان هيسافر السعودية مش استراليا
ولا هو اشتغل فترة فى السعودية وراح استراليا ولا ايه ؟؟

حاجات جوايا يقول...

الملاحظة دى كانت المفروض تبقى فى حلقة منار


القصة محتاجة تتراجع من الاول ككل قبل ما تتنقل فى مدونة خاصة عشان لو فيه تضارب فى الاحداث ولا حاجة نلحقها

يلا صباحكم سكر زيادة
:)

حنعيش يعنى حنعيش يقول...

ندى
تسلم ايدك ياست الكل ... كدة صلحتى ... هه .. صلحتى واللى يتغاظ يتغاظ ...هههههه
لا بجد انت كدة بينتى حاجات كتير ... حاريحكم واختار اسم القصة على اساس ان انا اللى بدأتها وبعد كدة يبقى اللى يبدأ القصة هوه اللى يسميها
الاسم ياريسه هوه : ثمن الاحلام

sony2000 يقول...

بجد حلقه حلوه كالعااااده:)
وخلاص التفاصيل بدأت تبان اهي

خواطر شابة يقول...

حنعيش يعني حنعيش
حلو اسم ثمن الاحلام انا معك فيه

غير معرف يقول...

الله ينور :)

لا جميله بجد .... استمروا كده بالاحداث

تحياتي

حنين يقول...

ازيك يا نوجا
وحشانى حلوه الحلقه وانتى دايما اختيارك للكلمات جميل وبثق فى افكارك
تحياتى

السُـلطانة يقول...

باين القصة وصلت للحبكة الدرامية .. ولم أتابعها من البداية لكنها جميلة .. سلمت النامل

خواطر شابة يقول...

اخيرا العرس الكروي انتهى وتتويج مستحق لاسبانيا فمبروك لكل عشاق الكرة الاسبانية مبروك لكل عشاق البارصا والريال

خواطر شابة يقول...

حنين
شكرا على اطرائك عزيزتي لكني لست كاتبة الحلقة انها ندى الياسمين القصة تكتب بشكل دوري من اشخاص متعددين مدونتي مجرد قناة للتوصيل
تحياتي وودي عزيزتي

خواطر شابة يقول...

sony2000
هيا عزيزتي شاركينا اكيد هذا من دواعي سرورنا

خواطر شابة يقول...

فتاة من الصعيد
غدا دوري ربنا يستر عزيزتي

خواطر شابة يقول...

السلطانة
عزيزتي سعيدة بالتواصل وان شاء الله يستمر دوما
تحياتي وودي

Unknown يقول...

ياااااااخواطر
ياااااااااشابة
يااااااااااانوجا
انتى وحشتينى وجيت اسلم
لأنك فعلا وحشتينى:صباح الفل:)

أحمد عبد الحميد يقول...

خواطر.. كيف حالك أختى العزيزة
أنا كتبت فصلين من قصة ومش فاضى أكملها خاااااااااالص
ينفع نكملها بنفس الأسلوب ده بعد القصة دى ما تخلص؟

حـــــروف متــبعترة " عــمرو الشــايب يقول...

انا مش متابع الحلقات بس عجبتني القصة اوى دي
تحسي انها دراما و احد حب و عشق و التاني بيلفق و يشيل عشان هي تشيل الخسارة و كل بينكر جميل كله
وو كل واحد فاكر انه صاحب فضل على التاني
و التسامح و الحب و التواضع معتش فيه مكان
لان الزمن ده بقى زمن الى يعلى لوحده يكبر لوحده هتعلي حد معاك هينزلك ف اى وقت كان

خواطر شابة يقول...

norahaty
وانت ايضا عزيزتي وحشتيني
هذه الايام والله ضغط العمل كبير لم أعد أجد وقتا للتواصل مع الجميع كما كنت أكيد هي فترة وستمر ان شاء الله
أسعدني تعليقك والله عزيزتي أحبك الله الذي احببتني فيه
دمت بكل ود

خواطر شابة يقول...

ابو حميد
انا رئيس نعم لكن الحل والربط ليس بيدي وحدي. سأطرح الموضوع على المشاركين واساسا نحن اتفقنا على طرح اقتراحات بشأن القصة الجديدة سنعتبر تعليقك اليوم هو اول اقتراح في الموضوع
دمت بود

خواطر شابة يقول...

MeGltNa 3mr Wa2el
كلماتك تحمل قدرا كبيرا من المرارة والتشاؤم الحياة فيها الابيض والاسود وكما فيها الشر فيها ايضا الخير فانظر للجانب الملئ من الكأس
دمت بكل ود

خواطر شابة يقول...

اعتذر للجميع لن استطيع نشر الحلقة اليوم سأفعل غدا ان شاء الله
عذرا شديدا للجميع لكن والله لظرف خارج عن ارادتي تماما وانا جاهزة لاي حكم تصدرونه
تحياتي وأرجو مرة اخرى تقبل اعتذاري

حاجات جوايا يقول...

ماشى يا ريسة
ولو انى كنت ملهووووووفة جدا على حلقة النهارده عشان حلقتى اللى بعدها وعمالة احط فى سيناريوهات بناء على عدة توقعات هههههههههه
بس وماله
نصبررررررررر
وربنا مع الصابرين
يارب يكون الظرف خير
دمتى بخير حبيبتى