الاثنين، 19 يوليو 2010

ليالي مصرية 30

الحلقة الاخيرة

بقلم حنعيش يعني حنعيش

ياسر : عايزة تيجى علشان تشمتى فيها ... جوزها بيموت وابنها ضايع منها ....سلمى وهى تبكى : انت فاكرنى شيطانه ... انا مابحبش ميار علشان انت بتحبها ... ياسر : يادى النيله ... والله مابحبها.... والله مابحبها .. انا بحبك انت ... ولو ماكنتش بحبك ماكنتش اتجوزتك .... سلمى : ماهو لو كنت اتجوزتها كانت جابت لك العيل اللى نفسك فيه .... ياسر : لا حول ولا قوة الا بالله ... ياسلوى يا حبيبتى ياروح قلبى ... العيال دى رزق والرزق بتاع ربنا ... انا عمرى ما فكرت فى العيال علشان انا عارف ان يوم ماربنا يكتبهم لى حيجوا ... انت اللى دماغك ضربت ... وبتقولى ميار جوزها عيان وبيموت .... وهوه لسه بيحبها ... يبقى ممكن يتجوزها ...دماغك اللى عايزة كسرها هيه اللى تعباكى ...

ياسلمى انا بحبك انت علشانك انت مش علشان عايز منك عيال ..رمت سلمى نفسها فى حضن ياسر وقعدت تعيط ... ياسر طبطب عليها وقال لها : اهدى بقى الله يخليكى ... سلمى وهى تدفن رأسها فى صدر ياسر: انا عارفه مين اللى خطف ابن ميار .... ياسر بعدها عن صدره وقالها ايه ... بتقولى ايه ؟!! ردت سلمى : انا شاكه بس متأكدة ... ياسر : منين شاكه ومنين متاكدة ؟!.... حكت سلمى ماحدث معها ومع عبد العظيم بك ... وما ان انتهت حتى امسك ياسر بيدها قائلا : انت مستنيه اية ؟!!! ياللا على ميار ..

********************

محمد كان قاعد فى المستشفى مع طارق .. وفى نفس الوقت بيعمل اتصالاته مع المستشفيات العالميه علشان يشوف احسن مستشفى واحسن دكتور يعمل عملية زرع كبد لطارق ...واختار مستشفى كبيرة فى المانيا اتفق معها على ان طارق يسافر بعد اسبوع .... دخلت عليه عبير : الحمد لله يا محمد انا كلمت كل المستشفيات مافيش حد بمواصفات اياد راح لهم ... محمد: انا كمان عندى خبر حلو ... بس مش عارف ابلغة لميار ازاى ... اتفقت مع مستشفى فى المانيا علشان زرع كبد لطارق ... بس المفروض يسافر الاسبوع الجاى ...

********************

ظابط المباحث طلب من ميار صورة كبيرة لاياد ... دخلت ميار اودة النوم علشان تجيب الصورة .... وصل ياسر وسلمى واول ماشافوا الظابط قالوا الحمد لله ان حضرتك هنا ... احنا عارفين مين اللى خطف اياد .... ميار وهيه خارجة من الاودة سمعت كلام سلمى اغمى عليها

******************

تم القبض على عبد العظيم ... رجع اياد لميار وطارق اللى سافروا المانيا ... طارق عمل العمليه ورجع زى الاول واحسن ....محمد وعبير قرروا انهم مايرجعوش من المانيا ... اكتشفوا ان هناك فيه طب بجد وادويه بجد وعلم بجد وبنى ادمين بجد .. كفاية انهم بيلاقوا ركنه للعربية .

*****************

هدى قدرت تخلص احمد من عقده.... واتجوزوا .... هما كمان هاجروا ... لانهم اكتشفوا ان المشروع اللى تخلص موافقاته فى مصر فى اربع سنين ..... يشتغل ويكبر ويكسب فى سنه واحدة فى بلاد الفرنجة

****************

سلمى خلفت بت بعد ست سنين جواز .... الغريبه ان سمتها ميار .... هيه اللى سمتها مش ياسر اللى كان فرحان قوى علشان خلف مش علشان سمى بته ميار.

*******************

ميار جابت مدير عام للشركه ... مابتعملش حاجه دلوقتى غير انها تشوف طلبات اياد وطارق ... ودايما تقول الست ملهاش غير جوزها وعيالها ... انا مش عارفة الستات بتعمل فى نفسها كدة ليه؟!!!!!!!!!!!.

*****************

زينب بقى رفضت تعيش مع ميار ولا تسافر مع محمد ولا تهاجر مع احمد ... قالت انا عايزة ارجع لبيتى اللى اتجوزت فيه وخلفتكوا فيه .... زينب كانت مبسوطة قوى وهيه عايشة مع ذكرياته .... كانت تقف قدام صورة فهمى وتقول له : وحشتنى ياحاج ... كدة برضة تفوتنى لوحدى ... دا محدش كان فاهمك قدى ولا مريحك قدى ... وانا كمان ماكنش حد فاهمتى وعارفنى قدك ... عارف ياحاج : انا كنت ببقى عارفة انك فاهم حركاتى ومحيلتى فيك ... وفى كل مرة اقول فى نفسى : حيشخط فيكى يابت ويقولك بطلى ياوليه حركات النسوان دى ... بس انت عمرك ماعملتها ... عمرك ما كسفتنى ولا كسرت بخاطرى .... ياحاج ........اوعى ياحاج ... وغلاوة النبى ..اوعى عينك تزوغ كدة ولاكدة على الحور العين
على فكرة انا منسيتش دعاء العيال لاخمينها قوي..... عايزة تطلعهم ثوريين لاخمينها قوى ... عايزة تطلعهم ثوريين ينادوا بالديموقراطية وحقوق الانسان ...ماهى ماعرفتش تكمل فى الموضوع ده .... ممكن علشان الجواز والعيال ... وممكن برضه علشان حست ان مافيش فايدة من اللى بتعمله .... وجايز يكون علشان العز بيعلم الكسل .... عموما هيه بتشتغل برضة بس من البيت .... بتكتب فى صفحة المرأة مقاله اسبوعية عن حقوق المرأة وازاى لازم تطالب بحقها فى انها تكون وزيرة ومأذونه وقاضية ..................

هناك 19 تعليقًا:

خواطر شابة يقول...

حنعيش يعني حنعيش
توتة توتة خلصت الحدوثة جميل ان ترى فكرتك تتجسد امامك وتنمو وتترعرع
اكيد ككل تجربة لابد ان فيها اخطاء البداية واكيد القادم سيكون احلى ان شاء الله
دمت بكل ود

خواطر شابة يقول...

حاجات جوايا
عزيزتي اسلمك المشعل لتقودي سفينة الليالي في الفترة القادمة
قصة قلب كامل التي بدأها ابو حميد قصة مبشرة بشخوص جميلة تعطي امكانية لنسج احداث كثيرة وكما فهمت من ردك على ايميلي انها لقيت اعجابك ايضا فلنتممها ان شاء الله بالتالي يكون هذا الجزء هو الحلقة الاولى من الليالي في جزئها التاني بقلم ابو حميد
تحياتي وودي للست الريسة

خواطر شابة يقول...

ندى الياسمين
عزيزتي يجب ان تناقشي مع حاجات جوايا طريقة النشر على مدونة الليالي لتبدأ القصة الجديدة مباشرة هناك
دمت بود عزيزتي

mrmr يقول...

توته توته خلصت الحدوته
الى لقاء اخر وقصه جديده من حكايات مصريه
جميل روح التعاون
ربنا يوفقكم ويسعدكم

sony2000 يقول...

سلسله اكتر من راااااااااااائعه
بجد استمتعن بقرأتها

shimaa elkholy يقول...

استااااااااااااااااذ

كده تخلي العالم كلها تطفش من البلد دي
هههههههههه

بس بجد حلوه اوي النهايه

حقيقى كنت مشفقه عليك ازاي هاتقفل كل الابواب المفتحه دي

بس كده تمام تسلم اديك



وخواطر عونيه حاضر
بس انا سلمت المدونه لدكتور اسلام خلاص

عموما ماشي هابلغها هايكون الشغل ازاي

shimaa elkholy يقول...

طب سالي معلش جيت ابعتلك لقيت عندي اكتر من حد على الاميل اسمه سالي والخطوط دخلت فى بعضها معلش ابعتيلى انتى كده اوف لاين ولا حاجه عشان اكلمك

حاجات جوايا يقول...

احساس مش عارفة اوصفه وانا بقرا الحلقة الاخيرة
احساس بالقشعريرة كده وبانى مش عايزة السطور تخلص
عاطفية انا باين
:)

الحلقة جميلة اوى والاسقاطات عالواقع المصرى الحالى عجبتنى
وان مكان الست فى بيتها عجبنى برضه
ولو انى زهقت من قعدة البيت ومش مصبرنى غير المدونة والنت :)


محمد وعبير راحوا المانيا ومرضوش يرجعوا
يا ريتها سهلة كده يا دكتور مكنتش هتلاقى حد هنا :)

عبد العظيم خرج من السجن ورجعله تانى
هو اللى بيجيبه لنفسه :)


سلمى جميلة وخليتنا تعاطفنا معاها .. هى مش وحشة وحقودة زى ما كنا متوقعين .. الجانب الحلو من شخصيتها ظهر لما الغيرة ولت والثقة بالنفس حلت محلها

رجوع زينب لبيتها وذكرياتها عجبنى برضه .. لما بيكون فيه مودة وسكن بين الزوجين بيستمر طول العمر حتى بعد الموت :)

دعاء بتشتغل من البيت .. ميه ميه .. انا عايزة من ده :)

..........

ايجابيات التأليف الجماعى من وجهة نظرى
........................
فتح افاق جديدة للخوض فيها مكناش نتوقعها
يعنى القصة دى لو واحد بس بيكتبها مكنش هيبقى فيها تفاصيل كتير بالشكل ده ولا كانت هتبقى 30 حلقة .. باعتبار ان دى اول تجربة ومش محترفين وصعب نسبح فى اتجاهات مختلفة .. ده غير انها كانت هتاخد وقت طويل وكسل وانا مجربة الموضوع ده ومفيش قصة طويلة بدأتها ووصلت لنهايتها

البحث والاطلاع عن حاجات تخص الحكاية عشان ميبقاش التاليف فانتازيا .. زى مثلا اصابة طارق بالفيروس
والمطلوب مننا اننا نبقى عارفين اعراض المرض ومضاعفاته واخطاره عشان نعرف نتكلم عنها
ده فى حد ذاته مفيد لينا ويخدم القصة فى نفس الوقت


الروح الجماعية الرائعة والالفة بين المؤلفين .. مهو محدش مجبر انه يشترك فى الكتابة الا اذا كان حابب فريق العمل فحتى النقد يتم تقبله


..........
عيوب الكتابة الجماعية
....................
اختلاف اسلوب الكتابة
فمنا من يكتب عامى ومنا من يكتب فصحى
ومنا من يكتب بطريقة الحكى واخرون بطريقة السيناريو والحوار

احتمال نتغلب عالمشكلة دى فيما بعد


الخلاصة
*****
انى سعيدة جدااااا بالتجربة دى وبانضمامى لكتيبتها ومتحمسة جداااا لاستمرارها وتطويرها وأتمنى محدش يزهق ويبعد



ادعوكم لكتابة مميزات وعيوب التجربة الاولى .. لنقوى الميزات وننميها ونتلافى العيوب بقدر المستطاع فى التجربة الثانية

تحياتى ل د اسلام صاحب فكرة الليالى .. وللرؤساء السابقين .. وللكتاب المشاركين ولكل المتابعين
وان شاء الله تستمر


تحياتى وتقديرى للجميع

حاجات جوايا يقول...

خواطر شابة
-----------
تن تا ترا تن تا ترا تن تا ترا را تن تا ترا

دى مراسم تسلم المشعل يا خواطر متتخضيش
ههههههههههه

ميرسى حبيبتى على مشعل الرياسة
وعلى ترشيحك وترشيح د اسلام
يارب اكون عند حسن ظنكم ان شاء الله


بس كلمة حق اقولها للتاريخ

خواطر شابة مثال للقائد المرن الودود
اللى الشعب ممكن يحبه بسهولة جدا ويصعب عليه فراقه ويتمنى يجددله فترة الرياسة دورات ودورات

كنت سعيدة جدا بفترة رياستك عزيزتى واتمنى تتكرر تانى قريب


حمدا لله على رجوع مدونتك خالصة لكِ تكتبى فيها ما تشاءين وقتما شئتى

توصلت بندى وتم الاتفاق.. لا تقلقى

تحياتى وودى وتقديرى عزيزتى

حاجات جوايا يقول...
أزال المؤلف هذا التعليق.
همسات وبحــ الحياه ــر يقول...

حلو اوى روح العمل الجماعى انا بحب جدا الموضوع دا
انا جربته مع واحدة صحبتى كنا نطلع افكار ونكتب وكان متعه
بجد بحييكم

Unknown يقول...

دكتور إسلام
ربنا يسمحك خليت جسم الواحد يقشعر عندما علمت ميار بأن أبنها تم معرفة مكانة ووقعت من الصدمة..
كمان خليت الدموع علي وشك النزول كمن كلام الحجة زينب مع المرحوم زوجها ..
حرم عليك تعمل فينا كدة ..
وبعدين المفروض كنت قلت جملت ميار مش ارفة هي الستات عاوزة اية كنت قلتها بالمذكر يعني مش عارف الستات عاوزة اية , لاني ضحكت منها وكنت أشعر أن راحت الدكتور إلام فيها ؟
المهم انتمبدع مكا تعودنا منك
تحياتي لك ولك الذين اشتركوا سواء بالكتابة أو بالقرأة


أرجوا من الريسة حجات جوايا أن لا تنسي وضع أسمي في القصة الجديدة للمشاركة
وشكرا
م/ علي يونس

أبو ريان يقول...

وصلت سفينة الجزء الأول من الليالي الى مرفأها وعشنا معها تجربة جماعية مثيرة.. أشكر صاحب فكرتها وجميع المشاركين,,
تحية خاصة لخواطر شابة التي استضافت بكل ود العشرية الأخيرة..أسعدني أن أشارك أختي في ورشة المحبة هذه...

غير معرف يقول...

مبرووووووووك

نهايه سعيده جميل اوي

مستنيين المسلسل القادم

تحياتي

حنعيش يعنى حنعيش يقول...

ربنا يخليكوا كلكوااااااااااااا ...
ونشاء الله اللى جاى احسن ونقدر نتلافى الاخطاء
شكرا شكرا شكرا

خواطر شابة يقول...

بالنسبة لاستطلاع الرأي حول افضل حلقة في العشرية التانية من ثمن الاحلام فازت به حاجات جوايا بحصولها على ستة اصوات
مبروك ياست الريسة عهد جديد وجوائز انا مش بأحسد انا بأقر بس هههههه

أبو ريان يقول...

زوروا مدونتي كل سنة مرة...

أبو ريان يقول...

زوروا مدونتي كل سنة مرة...

أبو ريان يقول...

زوروا مدونتي كل سنة مرة...